أثارت نتائج قرعة مباريات المرحلة النهائية من بطولة الدوري المصري، الكثير من الجدل حول طريقة تنظيمه، وموعد الإعلان عنه من قِبل لجنة المسابقات برابطة الأندية المصرية المحترفة.
كشف طه عزت، رئيس لجنة المسابقات في تصريحات خاصة لموقع تاكتيكا، عن سبب الإعلان عن جدول المباريات في ذلك التوقيت، وعن مبدأ تكافئ الفرص بين الأندية المتنافسة على اللقب.
وقال طه عزت، “احنا مشكلتنا إن احنا عايشين طول عمرنا في نظرية المؤامرة، في قرعة الدور الأول بيراميدز قابل الأهلي وبعد كده الزمالك ورا بعض، يبقى كده القرعة كانت موجهة لصالح بيراميدز !”.
وأضاف،”في الآخر كل الأندية بتلاعب بعض، بمجرد ما ماتشات الدور الأول خلصت الساعة 11:30، الناس كلها كانت موجودة في الرابطة وقعدت تشتغل علشان تطلع لك الجدول، ولو كان الجدول طلع متأخر تاني يوم الصبح كانوا قعدوا يقولوا اتأخرتوا ليه في الإعلان عنه”.
وتابع، “للأسف كل الناس هنا في مصر بتمشي ورا الترند، اللي عايز يتكلم يتكلم انت في الآخر بتعمل شغلك، الزمالك بيقول انت بتعمل الجدول عشان الأهلي يكسبني، والأهلي يقولك انت بتعمله علشان خاطر بيراميدز، وبيراميدز يقولك انت بتخدم الأهلي على حساب باقي الفرق”.
وأكمل، “احنا اتعودنا على كده، احنا بنعمل شغلنا لأننا عارفين إن الناس كده كده بتتكلم، ده الطبيعي كل مسؤول في أي نادي هيتكلم بوجهة نظر فريقه، وده مش في الكورة بس؛ ده في الحياة بشكل عام”.