تخيل معايا ملعب أخضر، وشبكة في النص وصوت كرة بتتخبط في الأرض وتترفع.. وفجأة، بام! تتشاط بمضرب رايح جاي. أيوا هي اللي دماغك راحت لها: “كرة التنس”. يلا بينا نعرف “أصل اللعبة”.
أصل اللعبة
التنس في الأصل كانت لعبة ملوك، ومكنوش بيلعبوها بمضارب.. كانوا بيلعبوها بإيديهم. لكن بما أن هؤلاء كانوا ملوك “عالم إيديها ناعمة حبتين”، بدأوا يلبسوا جوانتي شوية شوية، وبالتحديد في القرن الـ16 استخدموا المضارب.
أصل التنس كان في فرنسا، وأول اسم لها كان “jeu de paume” #النطق# “چو دو بوم”، يعني “لعبة راحة اليد”، مش بقولك ملوك! المهم أنهم كانوا واخدينها من كلمة فرنسية قديمة وهي “tenez” #النطق# “تُونى”، معناها “خُذ”، وكان اللاعبين بيستخدموها أثناء لعبهم.
لما اللعبة اتنقلت لإنجلترا، الكلمة اتغير نطقها مع الوقت من “tenez” إلى “tennis”، وبقى ده الاسم الرسمي للرياضة لما انتشرت عالميًا.
من القصور إلى عامة الشعب
كما قلت لك في البداية، كانت “لعبة ملوك”، في البداية كانت مقصورة على نشاط ترفيهي في القصور الأوروبية. ولكن، كما الجلاليب وصلت شرم الشيخ، بردو التنس اتسرب لعامة الشعب وبدأ يتعرف في طبقات أقل. في القرن الـ19، اتشهرت بطولة تنس بإسم “lawn tennis”، ودي كانت فكرة ضابط بريطاني اسمه “والتر وينجفيلد”، وتعرفت في إنجلترا وأمريكا.
لكن أول بطولة رسمية للتنس كانت سنة 1877، تحت اسم “الويمبلدون”. ومن ساعتها، بدأت شهرة التنس في التصاعد، وانتشرت في أكتر من بلد لحد ما أصبحت رياضة عالمية بفضل التليفزيون. خليني أقولك إن التلفزيون كان له دور كبير في الشهرة العالمية في التنس. أما بالنسبة للكرة، فالكبيرة كانت في تغيير لونها من الأبيض للأخضر الفسفوري (لموني)، وذلك لكي تكون أوضح في البث التلفزيوني.
البطولات العالمية
دلوقتي، التنس له بطولات عالمية كتير زي (الويمبلدون، بطولة أمريكا المفتوحة، أستراليا المفتوحة، ورولان جاروس)، والمعروفة جميعًا باسم “جراند سلام”. ومن بين الأساطير البارزين في اللعبة، نجد “روجر فيدرير، رافائيل نادال، ونوفاك دجوكوفيتش”. كما أن أبطالنا المصريين له دور كبير في هذه الرياضة، مثل كابتن إسماعيل الشافعي الذي وصل لربع النهائي في بطولة الويمبلدون سنة 1974، وكان مصنفًا رقم 34 عالميًا، وأصبح رئيس اتحاد كرة التنس المصري بعد اعتزاله.
الخاتمة
من أول ما كانت لعبة في قصور الملوك، لحد ما بقت رياضة الملايين، التنس فضلت دايمًا لعبة المهارة والذكاء قبل القوة. سواء على العشب، التراب، أو الأرض الصلبة… الكرة دايمًا بتلف، والحلم دايمًا بيكبر! وكل رياضة ليها حكاية، وكل لعبة ليها بداية.. والتنس، زي أي رياضة، وراها قصة، وكل لعبة بدأت من نقطة صفر.
لو حابب تعرف أصل الحكاية من أولها، خليك مع “أصل اللعبة”.
